Boklansering med Halvor Folgerø: Trolltunga. Eit vilt stykke norgeshistorie

Trolltunga har blitt ein Instagram-hit på nokre få år. Folk frå heile verda strøymer til Hardanger for å gå den ti timar lange turen. Journalist og forfattar Halvor Folgerø undersøker kva som skjer når nærmare 100 000 menneske har same turmål.

Det er også historia om knallhardt arbeid i barsk natur og tørrlagde fossefall. Området rundt Trolltunga gjekk gjennom ei ekstrem forvandling like etter 1900, og kraftutbygging og industri jaga vekk turistane.

No er ringen slutta i Odda. Turistane kjem i flokk og følgje, slik dei gjorde på 1800-talet. Kva gjer den nye turismen med det gamle industrisamfunnet og med naturen i området?

Halvor Folgerø (f 1967) er forfattar, musikar og journalist. Han er oppvaksen på Stord, bur i Bergen og har jobba i NRK i ei årrekkje. Dei seinare åra har han hatt eit stort gjennombrot som forfattar med levande skildringar frå vestlandet i bøkene; Vestlandsvegar og Fleire vestlandsvegar frå 2021 og 2022, og Ferjefolket frå 2024.

Føredraget hans startar 18:00 i Kulturnaustet ved Hardanger Fartøyvernsenter, og det vert høve til å kjøpa boka i etterkant. Inngangsbillett 125 kr, kan kjøpast gjennom lenkja nedanfor eller i døra.